بسم الله الرحمن الرحيم
أهلا وسهلا بكم أصدقائي أتمنى تكونون بخير حال ؟
أنا منى عبدالله اليوم حبيت أشارككم بطريقة تجديد طاولة ايكيا وتحويلها إلى ركن كوفي بسيط
وبما أن ركن الكوفي بيكون بالصالة والمساحة صغيرة جدا حبيت أسوي ركن الكوفي صغير وبنفس الوقت يجمل شكل الصالة ويكون إضافة حلوة لها
هي أصلا طاولة مدخل من إيكيا وهذا شكلها
وهذا أسمها للي حاب يبحث عنها بموقعهم
BRUSALI
😅 لكن المارد الي بداخلي أشتغل وقرر يحولها لطاولة أحط عليها آلات الكوفي
زي ماأنتم شايفين هذا شكلها الي قبل
سطح العمل جدا صغير ومايكفي للشغل , آلة بريفيل (breville) ملحقاتها كثيرة زي أداة الضغط والربلة الي تمنع خدش السطح , الميزان , الكوب وغيره .
والرف الي فوق صغيييير مدري وش كنت أحس فيه يوم شريته شوه الشكل وخلاه غير متناسق 😕
لو لاحظتوا الرف مو بمستوى الطاولة أصغر منها والاستاندات السوداء كبيرة مرة . 💔😄
أنطلق المارد الي بداخلي وقال يابنت يامنى ماتعملي حاجة حلوة وتغيري الشكل بطريقة بسيطة .
أول شي حددت مقاسات الطاولة من العرض والطول
بعدها أخترت قطعة خشب من محل عندنا تكون أكبر من السطح بما لايتجاوز 10 سم من كل يمين ومن يسار و 6 سم من الأمام ومن الخلف الخشبة من محل lows لكن تلقونها بكل محلات النجارة والخشب ومايشترط أي نوع خشب أهم شي مايكون خفيف
بعدها باستخدام المسطرة حددت مقاسات الخشب عشان أخليها بالضبط على الوسط من سطح الطاولة الأصلي
الأن صنفرت سطح الطاولة الأصلي , ممكن بعضكم يسأل ليه الصنفرة ؟ عشان الصمغ يمسك فيها بس أهم خطوة بعد الصنفرة تمسحون بمنشفة مبللة بشوي ماء وتمسحون كامل السطح من غبار الصنفرة
الآن جبت صمغ خشب وهذا شكله
ووزعته على كامل السطح بالتساوي وحاولت أكثر بالشكل هذا
حطيت عليها ثقل مرة قوي وتركتها 8 ساعات تقريبا
هم كاتبين على صمغ الخشب تتركينه من ساعتين الى ثلاث لكن أنا حبيت أطول الوقت أضمن
بعدما تاكدت من أنها لصقت على الطاولة مضبوط جبت جهاز الصنفرة وصنفرتها ونعمت الأطراف
_________________________________________________________________________
الآن جاء وقت الإبداع 😍
وأهم فقرة عندي حرفيا .....
وهي ( الصبغ )
خلطت لونين وممكن تحطون أي لون أنتم حابينه
أجمل مافي هذي الصبغة أنها سائلة زي الموية وتحافظ على الخشب الأصلي والعروق ماتخرب
شكل الطاولة بعد الصبغ
تركتها تنشف تقريبا ليلة لين مسحتها بمنديل شفت أنها جفت
------------------------------------------------------------------------------------
الآن بديت أشتغل على الرف أخترت رف نفس طول الطاولة
و بنفس الخطوات صنفرة وصبغ بنفس الألوان
الآن هذي خطوة اختياريه ممكن تسوونها وممكن لا رشيت بخاخ يمنع الموية تخرب الخشب يعتبر طبقة حماية للخشب
فيه منه بخاخ وفيه منه دهان نفس الشي يعني
مكتوب تتركونه 24 ساعة لين يتشربه الخشب زين
وهذا ركن الكوفي طلع بهذا الشكل 😊😍
وهذا شرح بقناتي باليوتيوب وتصوير للخطوات بالفيديو بالتفصيل لتجديد ركن الكوفي 👇
أتمنى أستمتعتوا وأنتم تشوفون الموضوع
وهل عجبكم الركن أو لا ؟
أكتبوا لي في الكومنت إذا حبيتوه أ ولا واقتراحاتكم أستفيد منها , يعطيكم ألف عافية
حساباتي :
أنستقرام :
https://www.instagram.com/mno0_12/
سناب شات :
snapchat: monaabdullah110
وهذا رابط قناتي على اليوتيوب أسعد باشتراككم :
تعليقات
إرسال تعليق